INOPACAN, LEYTE – Gindumara han Inopacan, Leyte an groundbreaking ceremony ngan MOA signing han pinakasyahan nga Tourist Rest Area ha rehiyon ha pangunguna nira Department of Tourism Secretary Christina Garcia Frasco, 5th District Leyte Congressman Carl Nicolas Cari, ngan iba pa nga opisyales han gobyerno.
An nasabi nga Tourist Rest Area in ginpondohan hin P10-M, kun diin panuyo hine nga lugar nga tagan hin maupay nga parahuwayan an mga turista samtang naghuhulat han ira sasakyan nga barko tikadto han isla nga ira bibisitahon.
Kalakip naman ha mga ginlalauman nga pagtutukuron ha nasabi nga rest area in an shower area, rest room, charging station, ngan Pasalubong Center.
Nakatalaan gihapon pagtukuron ha may Calicoan Island ha Eastern Samar ngan syudad han Tacloban an nasabi nga parahuwayan han mga turista.
Ha lain nga bahin, ginhangyo naman ni Inopacan, Leyte Mayor Rogelio Pua Jr. ha Department of Tourism nga tagan pa an ira bungto hin pondo agud marehabilitar an boardwalk han ira bungto nga nagkakantidad hin maabot P30-M, agud mas maka-aghat pa hin mas damo nga turista. (via Bombo Niña Magpili)
