TACLOBAN CITY – Boluntaryo nga sumurender ha 78th Infantry Battalion han Philippine Army an usa nga High Ranking Leader han New People’s Army ngan usa nga doktor ha Brgy. Lalawigan, Borongan City, Eastern Samar.
Ginkilala an mga ini kanda alyas Arman, gintutuohan nga Commander han Apoy Platoon, SRC Sesame ngan alyas Peter usa nga medical officer tikang ha Squad 1 han Apoy platoon nga parehas ilarum han Eastern Visayas Regional Party Committee.
Sumala kan Maj. Kaharudin Cadil, Civil Military Officer han 802nd Brigade, 8ID, Philippine Army, nga kaupod nga ginsurender gihapon nira alyas Arman ngan Peter ha gobyerno an duha nga M16 Rifles, tulo nga (3) steel ngan duha (2) ka-plastic long magazines, lima (5) nga steels ngan usa (1) ka-plastic magazine ammunitions, duha (2) nga bandoliers, usa (1) nga improvised hand grenade, medical kits, mga dokumento, ngan iba pa nga personal nga gamit.
Dugang naman han opisyal nga ginkokonsidera han 78th Infantry Battalion ngan an pagsurender hini nga duha nga higtaas nga opisyal han walhon nga grupo in pamatuod la nga nahinay na iton pwersa han insurhensiya ha Sinirangan Bisayas ngan indikasyon gihapon ini nga ginpili han mga ini nga mabuhi na hin mahimyang.
Samtang, ginaaghat naman hi Maj. Cadil ha mga nabibilin nga miyembro han walhon nga grupo nga bumalik na ha gobyerno agud makaupod na nira iton mga pamilya ngan higugmaon ha kinabuhi ngan agud mabuhi na hin mahimyang ngan waray na kasamok.
