TACLOBAN CITY – Igindeklara mismo han Commission on Elections (COMELEC) nga mahimyang ngan malinampuson an gindumara nga plebesito ha Ormoc City yana nga adlaw Oktubre 8.
Panuyo hini nga pag urusahon an 28 nga mga barangay para magin “superbarangay”.
Subay ha datos, ha 5,335 nga bumotos ha eleksyon, 4,767 an bumotos hin “Yes” o kon pabor hira nga pag-urusahon an mga barangay samtang 538 an bumotos hin “NO” o diri pabor.
Tungod mas damo an pumabor, an Barangay 1 kutob 8, 12, 13, 15, 17, 23, ngan 27 in magigin usa nga super-barangay ngan ngangaran ini Brgy. South Poblacion.
Samtang an Barangay 9 kutob 11, 16, 18, 25, ngan 28 in tatawagon nga Barangay East Poblacion.
An Barangay 14, 19 kutob 22, 24, ngan 26 in tatawagon liwat nga Brgy. West Poblacion ngan an Barangay 29 in nangangaranan nga Brgy. North Poblacion.
An plebesito in personal mismo nga ginpangunahan ni Comelec Chairman George Garcia, kaupod an tulo pa nga Commissioners ngan mga opisyales han Comelec.
Iginkalipay ni Garcia nga damo nga mga tawo an gumawas ngan bumotos ha eleksyon.
“We are happy that many people came at napakaayos, napakaganda ng nangyaring plebisito. What’s important is that the people who are involved were able to express their sentiments, to express their feelings. Because in the final analysis, what is at stake here is the future of the city,”, pahayag ni Garcia sa usa nga interview.
Sumala liwat kan Comelec Eastern Visayas Regional Director Jose Nick Mendros, maabot hin 105 nga mga magturutdo an nagserbi ha mao nga eleksyon ha 35 nga clustered precincts ha Ormoc City Central School nga gin abrehan ha mga botante ala 7 han aga kutob alas 3 han kulop.
Umabot hin PHP8 million an gingastos han Ormoc City government ha mao nga plebesito.
Kon manunumduman dida han ika 19 han Enero 2021 nagmugna an Ormoc City Council hin ordinansa para magkaada hira hin plebesito nga ginpadig-un han Comelec Resolution No. 10796.
Siring ni Ormoc City Mayor Lucy Torres Gomez nga panuyo hini nga eleksyon nga mas matagan pa hin mas maupay nga serbisyo an mga residente hini nga mga barangay.
