Pwede na magamit an pondo han Department of Agriculture (DA) nga nakaalutaga kumo fuel subsidy para ha mga parag-uma, kadungan han padayon nga pagsipa han presyo han mga produkto nga petrolyo.
Sumala kan DA Spokesperson Asec Arnel De Mesa, mayda na aludayday an ahensya nga magseserbi nga giya ha panhatag han nasabi nga bulig.
Kaupod dinhi an pagigin membro han Registry System for Basic Sectors in Agriculture (RSBSA), pagkakamay-ada hin farm machinineries nga ginagamit ha pagtatanom, pagkakamay-ada hin mga baluto nga pangisda nga dire malahos ha tulo katonelada an gross tonage, ngan iba pa.
Sumala kan De Mesa, mayda P150 milyon nga nakaalutaga para ha fuel subsidy nga nagtikang pa ha 2025 budget han ahensya. Waray kagamit an nasabi nga pondo ha nakalabay nga tuig ngan pwede pa ini magamit kutob ha bulan han Disyembre.
An P150 milyon in pantay nga pagtutungaan han mga parag-uma ngan mga paru-pangisda.
Ha presente, nai-download na ha DA an maabot P100 milyon ngan pwede na magamit ha anuman nga oras.
Kun maubos an P100 milyon, kinahanglan anay ig-request han DA an nasasalin nga P50 milyon ha Department of Budget and Management.
Dugang pa ni De Mesa, ginlalauman nga makakatagamtam an maabot ha 15,000 nga parag-uma ngan 28,000 nga paru-pangisda ha nasabi nga pondo kun diin an inisyal nga plano, kada parag-uma in makakarawat hin tag-P5,000, samtang tag-P3,000 naman an mga paru-pangisda.
Aminado an opisyal nga kulang an nakaalutaga nga pondo mahitungod ha kadamo han mga paru-pangisda nga nanginginahanglan hin bulig samtang nagtitikaduro an kasamok ha Middle East.
