TACLOBAN CITY – Ginpahayag ni UP Tacloban College Divison of Social Sciences Asst. Prof. Gerwyn P. Enerlan, nga mahitungod ha nagpapadayon nga tensyon ha Middle East, in dako an epekto ini ha ekonomiya han Pilipinas ngan dako gihapon an posibilidad nga sumaka an inflation rate o an presyo han mga papliton.
Dugang hini nga ha pagkayana, in maabot hin 90% an petroleum requirements han nasud nga tikang ha gawas, sanglit an bisan ano nga kasamok ha Strait of Hormuz in may direkta ngan dako nga epekto ha lokal nga presyo han krudo ngan gasolina.
Ginpahayag ni Enerlan nga bulnerable an Pilipinas ha mga geopolitical conflict, tungod nga an pagsaka han presyo han enerhiya in nagreresulat hin “domino effect” ha magkadurudilain nga sektor.
Dako nga maapektaran hini an sektor han transportasyon ngan agrikultura mahitungod ha paghitaas han fuel.
Basar ha pinakabag-o nga datos yana nga Marso 2026, an inflation in sumaka na ha level nga 3.4% tubtob 3.9%, ngan posible pa ini lumahos ha target han gobyerno kun diri dayon mababaton an krisis ha lana.
Samtang, agud naman maproteheran an ekonomiya tikang ha mga external shocks, in ginsuhestyon ni Prof. Enerlan nga kinahanglan mag-implementar an gobyerno hin mga targeted subsidies para ha mga sektor nga pinaka-apektado ngan gamiton an strategic petroleum reserves agud diri makalasan an publiko han presyo ha merkado.
