TACLOBAN CITY – Ginhihingyap hiton mga lider tikang ha Eastern Samar nga makakaalinggawas ha listahan han ”poorest province” ha Sinirangan Bisayas pinaagi hin pagtindog hin bag-o nga mga imprastuktura.
Sumala kan 4P’s Partylist ngan Minority Leader Marcelino ”Nonoy” Libanan dako nga bulig iton paghimo hin mga bag-o nga karsada agud mas magin maupay an kinabuhi han mga taga- Easten Samar.
Ginpahayag hini nga nga ha maabot nga Agosto yana nga tuig, nakatalaan nga abrehan an Samar Island Circumferential Road.
Ini nga proyekto in nagtikang dida han 11th Congress, ha syahan nga termino ni Libanan pagka-kongresista, kon diin ginhimo nga arterial road an Taft-Oras-San Policarpo-Arteche-Lapinig-Gamay-Simora Road-Mapanas tipakadto ha Catubig, Northern Samar.
Nagpadayon iton konstruksyon hini nga kon mahuman in magigin diru-diritso na it biyahe tikang ha Eastern Samar tipakadto ha Northern Samar.
Samtang, nakatalaan liwat nga pagdumaraon iton inagurasyon hiton P340-M Maydolong-Basey Road Project yana nga bulan.
Ini in ginkakalakipan hin 51.775 km nga syahan nga gin-implementar kumo “Tourism Road” Project.
Kon matapos an proyekto magseserbi ini nga pinakahalipot mga ruta tikang ha Borongan tikadi ha Tacloban City.
Mai-ibanan an oras hit biyahe hin haros usa hin tunga ngada duha ka-oras tikang han nahi-araan nga upat ka-oras nga biyahe tikang ha Borongan tipakadi ha Tacloban City.
Nagpapadayon liwat iton pagkarsada han Dolores- Maslog Road ngan sunod nga tuig in bubutangan daw ini hin pondo nga P450-M.
Dugang pa han kongresista nga tanan nga mga proyekto nga makakabulig ha progreso han probinsiya in tatagan nira hin prayoridad kaupod ni Eastern Samar Representative Ma Fe. Abunda.
Kakulop, Mayo 2, gintambungan han duha nga kongresista an groundbreaking ceremony han pagtitindugon nga multipurpose hall ha Eastern Samar State University – Guiuan Campus kaupod hi Guiuan Mayor Annaliza Gonzales – Kwan, University President han ESSU- Guiuan Campus, Dr. Andres Pagatpatan Jr., ngan iba pa nga mga opisyales han ESSU.
Ini nga proyekto in dati na nga ginpondohan ni Cong. Abunda pero waray katapos sanglit, ginbutangan ini utro hin hapit PHP30million nga budget ha ilarom ha mga General Appropriation Act (GAA) 2023.
Nagtutuo an duha nga kongresista nga importante nga tagan hin dako nga suporta an mga programa may kalabutan ha edukasyon tungod usa gihapon ini nga pitad para makaalinggawas ha kapobrehan an Eastern Samar.
Nagpahimtangon liwat an duha nga ha kontraktor han proyekto nga padig-unon an pundasyon han struktura labi pa permi naagi-an hin bagyo an Eastern Samar.
Mababaruan nga ha datos nga ginpagawas han Philippine Statistic Authority dida han Oktubre 2022, usa an Eastern Samar ha mga gipopobrehi nga probinsiya ha Sinirangan.
Pero ha luyo hini, umubos an poverty incidence ha probinsiya tikang ha 49.5 percent dida han 2018 ha 37.7 percent han 2021.
