TACLOBAN CITY- Ginbida, ngan ginpakita an magkadurudilain nga mga pagkaon nga nagtikang ha iba-iba nga parte han Sinirangan Bisayas ha ginbuhat nga duha ka-adlaw nga Eastern Visayas Streetfood Fest 2026 ha Tacloban City.
Napuno hin mga tawo an parte han baywalk ha may Magsaysay Boulevard, Tacloban City dida han Abril 24-25, 2026 mahitungod han mga magkadurudilain naman nga mga pagkaon sugad han Soya Tuba Ice Cream, Piaya, Kabak, Milky donut, Empanada, Baduyang Ube, Baduyang Pasayan, Pinaypay, Waffle, Buttered cake ngan damo pa nga iba.
Sumala kan Department of Tourism Region 8 Regional Director Karina Tiopes, nga ginbuhat nira an mao nga programa kumo kaparte han selebrasyon han Filipino Food Month yana nga bulan han Abril.
Hingyap gihapon ni Tiopes nga magin kinada-tuig na an mao nga aktibidad agud nga padayon naman nga mas maiduso pa an mga streetfoods nga tikang ha Sinirangan Bisayas.
“Hinaut unta sunod nga tuig mayda mag volunteer nga province nga mag host gihapon ini ha iba nga part it region 8 para malibot natun, makatilaw an nga tanan nga taga Eastern Visayas kun ano gud an mag upay nga mga streetfood dinhi ha atun rehiyon.” yakan ni Tiopes.
Samtang, nagkaada gihapon hin booth an Department of Agriculture Region 8 nga kun diin, dara naman nira an iba-iba nga mga produkto pan agrikultura nga nakapamalit an mga indibidwal ha barato naman nga kantidad.
