TACLOBAN CITY – Dakop an duha nga high-value individuals ha ginbuhat nga drug buy-bust operation han mga otoridad dida han nakalabay nga adlaw ha Barangay 66 Paseo de Legaspi, Tacloban City.
Ginkilala an mga nadakop nga mga drug suspect kanda alyas “Topi” 35-anyos, residente han Brgy 106 North Hill, Tacloban City ngan kan alyas “Mak”, 21-anyos ngan residente han Brgy 59-A Sampaguita, Tacloban City.
Nakumpiskar han mga otoridad ha mao nga operasyon an duha ka-pakete han shabu nga subject for sale, kadugangan pa nga 7 ka-pakete nga kun diin, nagkakantidad hin maabot P6M ha kabug-usan, digital weighing scale, 19 nga 1000 peso bill, 29 nga 500 peso bill nga buy-bust money.
Samtang, kapot na hiton kapulisan an mga suspek, ngan maatubang an mga ini ha kaso nga pagtalapas hiton Republic Act 9165 o Comprehensive Dangerous Drug Act of 2002.
