TACLOBAN CITY – Dakop han mga otoridad an duha nga street level drug personalities ha gindumara nga drug buy-bust operation ha Brgy. 101 New Kawayan, Tacloban City dida han mga nakalabay nga adlaw.
Ginkilala an duha nga suspek kan alyas “Teting”, 33-anyos nga lalaki, waray trabaho, ngan residente han Paraiso San Jose, Tacloban ngan kan alyas “Kent”, 30-anyos nga lalaki, waray gihapon trabaho, ngan residente han Sampaguita, Tacloban City.
Narekupo han mga otoridad durante han operasyon an usa ka pakete hiton gin-aalegar nga shabu, unom nga kadugangan pa nga pakete han mao nga ilegal nga droga, usa-ka unit hiton Toyota Corolla Silver ngan susi hini, .45 calibre nga pistola nga mayda magazine ngan amunisyon, usa-ka assault rifle 9mm caliber nga mayda gihapon magazine ngan amunisyon, usa-ka kaha hiton pula nga sigarilyo, usa ka itom nga pitaka, 9 nga photocopy hiton one-thousand-peso bill nga ginaaligar nga budol money, ngan buy-bust money.
Dayon naman nga gindara an mga nakumpiskar nga droga ha Regional Forensic Unit 8 agud mabaruan an kabug-at ngan estimated market value hini ngan iton kaangayan nga disposasyon hini.
Samtang, nakapaslak na an duha nga suspek ngan papasakahan hin kaangayan nga kaso ha pagtalapas ha RA 9165 o an Comprehensive Dangerous Drugs Act of 2002.
