TACLOBAN CITY – Nagpahimatngon an Department of Trade and Industry (DTI) Region 8 may kalabutan han kahimtang han suplay han mga produkto ngan han mga pitad nga ginhihimo han mga negosyo ha rehiyon tungod han limitado nga pag-agi ha San Juanico Bridge.
Sumala kan Department of Trade and Industry (DTI) Region 8 Information Office, Anthea Aivi Borbon-Ancheta, nakikipag-kooperar an mga local nga negosyante, distributors, ngan logistics partners agud masiguro nga padayon nga may-ada supply han mga produkto an bug-os nga rehiyon.
Usa han mga ginhimo nga solusyon han mga kompanya in amo an pagtukod hin mini hub ngan pag-renta hin mga warehouse ha Calbayog ngan iba pa nga parte han Samar.
Ini nga mga pitad in kabahin han istratehiya han DTI 8 agud direkta nga maidul-ong an mga produkto tikang Manila ngan Cebu ngadto ha Samar, ngan diri na kinahanglan pa nga umagi ha regional hub ha Tacloban.
Ha pagkayana in ginagamit han mga negosyante an sistema nga transloading ngan crossdocking, kun diin an mga produkto nga sakay han mga dagko nga truck nga diri makaka-agi ha San Juanico Bridge in ginbabalhin ha mas gutiay nga sarakyan nga pwede makatabok ha San Juanico Bridge.
Ginsigurado gihapon han DTI Region 8 nga padayon an ira pamiling hin mga pamaagi agud diri maapektohan an presyo ngan supply han mga essential goods ha Eastern Visayas. (via Bombo Shiela Encio)
