TACLOBAN CITY – Padayon nga gin aaghat han Department of Trade and Industry (DTI) Leyte an mga negosyante partikular na an mga sole proprietorship nga igpa-rehistro ngan i-renew an ira business name agud masigurado nga legal, talwas, ngan protektado an ira operasyon.
Subay ha DTI Leyte, an pagpaparehistro han business name in importante nga pitad ha pagtutukod han usa nga lehitimo nga negosyo.
Labot ha pagigin rekisitos ha pagkuha han Mayor’s Permit ngan pagpaparehistro ha Bureau of Internal Revenue (BIR) in nagseserbi gihapon ine nga proteksyon kontra ha paggamit o pagkopya han ngaran han negosyo han iba nga indibidwal o grupo.
Gintagan-duon han opisina nga 100% na nga online an proseso han business name registration tikang pa dida han nakalabay nga tuig.
Mahitungod hine, pwede na mag-apply an mga negosyante anuman nga oras o bisan diin nga lugar ha online registration.
Sakop han online system an bag-o nga rehistro, renewal, cancellation, ngan pag-upgrade han sakop han negosyo.
Gintagan-duon han opisyal an importansya han pormal nga pagpaparehistro kumo pundasyon han usa nga madig-on ngan matatapuran nga negosyo, ngan padayon hine nga gin aaghat an publiko nga singabuton an mas pinadagmit ngan moderno nga sistema han serbisyo han ahensya.
