TACLOBAN CITY – Ginpahayag han Department of Trade and Industry (DTI) Regional Office 8 nga mayda gutiay nga paghitaas ha presyo han pira nga mga school supplies basar ha ginpagawas han ahensya nga revised “Suggested Retail Price” o SRP.
Sumala kan Eleonor Etulle, Chief han Consumer Protection Division han DTI 8, kasumpay han ginlalauman nga pagtitikang utro han klase in nagpagawas an ira ahensya hin usa nga bag-o nga listahan han price guide para ha mga school supplies tungdo nga dire na detalyado an dati nga listahan hini.
An mao nga bag-o nga listahan in mayda na mga detalye ngan tatak.
Para ha mga notebook, kaupod ha bag-o nga guide an kadako, number of leaves, kalidad han papel, brand name ngan iba pa nga detalye.
An mao nga mga impormasyon sumala ha DTI, in makakabulig ha mga kag-anak ngan mga estudyante nga igkumpara an mga presyo han tindahan.
Ginbabana-bana nga maabot ha 10% an increase ha presyo han pira nga mga school supplies pero sulod la gihapon ini ha ginpagawas nga revised SRP samtang an iba naman nga mga kagamitan ha eskwelahan in waray magkaada hin increase o paghitaas ha presyo.
Mahugot naman an monitoring han DTI 8 agud nga masiguro nga magsusunod an mga tindahan ngan mga establishmento ha mao nga revised SRP.
