TACLOBAN CITY- Naka-preposition na an Department of Social Welfare and Development (DSWD) Regional Office 8 han ira mga relief goods nga igpanharatag ha mga possible madarahigan han bagyong Tino, nga ginlalauman ga maglalandfall ha 3 nga mga lugar, partikular na ha Guiuan Eastern Samar, Leyte, ngan Dinagat Island Mindanao, yana nga gab-i o temprano nga adlaw han Nobyembre 4, 2025.
Sumala kan Kenny Unay, Disaster Response Monitoring Information Center DSWD Regional Office Vlll, ha pagkayana in mayda hira 134, 531 nga food packs nga nagkakantidad hin P77. 1M, non food items nga 20,664 kabalyo han P35.2M, ngan 18, 473 nga mga ready to eat food items nga nagkakantidad naman hin P16.9M ngan mga bottled waters.
Hapagkayana, an pinakadamo nga food packs an na-preposition in ha Leyte, kun diin maabot ini ha 43, 393 nga Family food packs, 5,940 nga magkadurudilain nga mga non-food items, 9, 873 nga ready to eat food, ngan 4,586 nga bottled water para han mga apektado han bagyo.
Sumunod naman an Northern Samar, nga may-ada 29, 457 nga family food packs, 6,562 nga iba-iba nga non-food items, 8,600 nga ready to eat food, ngan 264 nga de-botelya nga tubig.
Samtang an Western Samar, in mayda liwat 16,584 nga family food packs, ngan 3,495 nga magkadurudilain nga mga non-food items an mga nakapre-position na.
An Eastern Samar in mayda 20,627 nga family food packs, 1,992 nga ready to eat food items ngan sobra 1000 nga battled water.
Ha Southern Leyte, mayda 19,972 nga family food packs, ngan 1,978 nga magkadurudilain ready to eat food items.
Samtang an Biliran in may naka-alutaga nga 4, 998 nga mga food packs ngan 697 nga mga non food items.
Magdudugay naman an nasabi nga mga food items ha sulod hiton 2 ngada 3 ka-adlaw nga pwede ig-konsumo han usa nga pamilya.
