ALBUERA, LEYTE – Direkta nga ginpahayag ni Albuera, Leyte Mayor Kerwin Espinosa ha gindumara ha presscon kadungan han iya panumpa kumo bag-o nga alkalde, dida han Hunyo 30, nga tikang ha Abuyog, Leyte ngan Ormoc City an suplay han droga ha Albuera.
Dugang pa hine, kaurugan nga nadadakop nga mga drug pushers ha ira bungto in gintutudlok an Abuyog ngan Ormoc nga ira ginkukuhaan han droga.
Posible daw nga mayda an mga ine protektor—pulitiko, opisyal, o pulis—mahitungod nga kampante man an mga ine.
Dida han nakalabay nga Hunyo 29, nakighampang na daw hiya ha Philippine Drug Enforcement Agency ngan nangaro hin bulig nga limpyuhon an droga ha ira bungto.
Gin manduhan daw gihapon niya an mga ine nga dire igsumat haiya an ngaran han mga darakpon agud dire naman hiya pagdudahan.
Ginduon pa hine nga waray mamamatay ha ira mga operasyon kontra droga, kun diin gin aghat pa ngani hine an mga nagamit han iginbabawal nga droga nga dumaop la ine ngan sumurender mahitungod nga mabulig hira agud makalimtam han mga ine an maraot nga bisyo.
Samtang, plano gihapon han nasabi nga alkalde nga magtukod hin opisina hin PDEA ha ira bungto para han madagmitan nga mga operasyon, ngan dire na kinahanglan nga kumadto ha region para makig-koordinar.
Kalakip gihapon ha plano hine nga pagtukuron in an opisina han Armed Forces of Philippines ngan Philippine Coast Guard agud mabawi nira an ira municipal waters mahitungod nga ha yana in kapot daw ine han Ormoc City.
Sumala pa kan Espinosa, usa nga milagro nga buhi pa hiya hasta yana kun diin panuyo daw ine han Ginoo agud makag-serbi pa hiya kumo public servant ngan mapuypoy an droga ngan masolusyunan an mga problema han ira bungto, sugadman in maipadayon pa an mag-upay nga plano han iya amay nga hi anay Mayor Rolando Espinosa Sr. ha Albuera.
