TACLOBAN CITY- Padayon pa nga guinlalamayan ha pagkayana an driver han usa nga single motorsiklo mahuman nga makabanggaan an usa nga van ha Barangay Libertad, Palo, Leyte.
Mababaruan nga guinmanehuan an van nga may plate number RDP 633 ni PO3 Jerson Asildo Rosales, 36 anyos an pangidaron, may asawa ngan residente han Barangay 74 Nula-tula ha syudad han Tacloban.
Samtang guinkilala an namatay nga driver han single motorsiklo nga hi Samuel Ranis Ranido, 38 anyos an pangidaron , welder ngan residente han Barangay San Roque, Sta Fe, Leyte.
Samtang, backrider naman hini an duha nga patod nga hira Jaime Terrencio Ranido ngan Rogelio Caalis Ranido nga pareho pa nga guintatambalan ha Leyte Provincial Hospital (LPH).
Sumala kan PCI Joselito Villas, hepe han Palo PNP nga magkatapo ha dalan an duha nga sarakyan kun diin umagaw ha kaluyo nga lane an single motorsiklo nga nagresulta ha pagkabungguay han duha nga sarakyan.
Samtang, nanawagan naman hi Villas ha tanan nga gumaramit hin sarakyan nga maging mabinantayon ha tanan nga higayon agud mahirayo ha disgrasya ha kakalsadahan.
