TACLOBAN CITY – Padayon an ginbubuhat nga imbestigasyon han mga otoridad bahin han nahitabo nga aksidente ha Paranas Samar nga nagresulta hin upat nga sundalo nga patay ngan pito nga indibidwal nga samaran.
Sumala kan Pol. Col. Andre Dizon, Provincial Director han Samar Police Provincial Office (SPPO), iginpailarom na ha eksaminasyon an driver han wing van nga hi Elvin Brillanes, nga ginsususpetsaran nga nakainom hin makahurubong nga irimnon han mahitabo an insidente.
Subay gihapon ha inisyal nga imbestigasyon, biyahe pakadto ha Catbalogan City an mao nga wing van han bungguon hini an usa nga tricycle nga nakada han atubangan hini, rason para mahingadto ini ha kaluyo nga linya han karsada ngan nakabungguay liwat hini an nakatapo nga Toyota hilux kun diin sakay an mga sundalo tikang ha 801st Brigade han Philippine Army nga nakabase ha Hinabangan Samar.
Nahibaruan nga tibalik na unta an mao nga mga kasundaluhan ha ira headquarters han mahitabo an insidente.
Mahuman nga bungguon an duha nga sarakyan in dumiretso pa an mao nga wing van ha usa nga balay nag nakapagdurot gihapon hin distroso.
Ha pagkayana in padayon naman nga gintatambal an pito nga nasamaran kaupod na an mga pasaheros han tricycle ngan driver hini sugadman an duha nga sundalo.
