TACLOBAN CITY – Nakatalaan nga mag-instalar hin mga 17 nga mga rainwater collector an Department of Public Works and Highways (DPWH) ha pira nga parte han Leyte labi nga masukot an pag-inuran ha rehiyon.
An mao nga P3.4 million project in ig-iinstalar ha pira nga mga eskwelahan ha Leyte ngan pangungunahan ini han DPWH Leyte 2nd engineering district kun diin target nga makompleto ini yana nga tuig.
Sumala kan District Engineer Carlos Veloso, prayoridad han mao nga proyekto an mga eskwelahan nga waray suplay hin irimnon nga tuig.
Dugang pa ni Veloso nga ha mao nga proyekto an tubig tikang ha uran in kokolektahon pinaagi han mga tubo nga nakakonekta ha atop han mga school buildings ngan ini naman in pwede nga magamit nga tubig para ha kasilyas, washrooms ngan iba pa nga mga pasilidad.
Nahibaruan nga an rainwater collectors in subay ha prototypes han DPWH sugad han reinforced ground storage tank nga may 4,000 litro nga kapasidad.
Panuyo han mao nga proyekto nga matagan hin sulosyon an problema bahin han nagtitikaguti nga suplay hin freshwater mahitungod han over extraction han groundwater, polusyon, diri epektibo nga mga water infrastructures ngan sugad man an pabag-o bag-o nga klima o panahon.
An rainwater collector system in ig- iinstalar ha Catams Elementary School, Tagak Elementary School, Ponong Elementary School, Jugaban Elementary School, Guindapunan Elementary School, Minuhang Elementary School, Minuswang Elementary School, Barugo Central School, Culasian Elementary School, Tunga Central School, Gregorio C. Catenza National High School, Capoocan Elementary School ngan Calingcaguing National High School.
