Gin hangyo han Department of Transportation (DOTr) ha airline companies nga mag-alutaga hin libre nga cargo space para ha pagdadara han relief goods ha mga lugar nga duro nga naigo han Super Typhoon Uwan.
Ine in pinaagi han Civil Aeronautics Board (CAB).
Ha advisory nga ginpagawas ni CAB Executive Director Carmelo Arcilla, gin hangyo hine ha mga kumpanya nga suportahan an nagpapadayon nga relief operations ha mga duro nga naapektaran han bagyo.
Ha ilarom hine, gin aghat an mga air carrier nga mag-alutaga hin cargo space para ha libre nga pagbibiyahe ngan pagpapadara han relief goods ha mga apektado nga lugar, kaparte han safety ngan operational limitation ha transportasyon.
Dayun naman nga magigin epektibo ngan igpapatuman han CAB advisory ha sulod han 30 kaadlaw, labot nala kun ine in babawion o papahalawigon pa.
Syahan na gihapon ine nga ginbuhat han CAB kasunod han nauna nga paglasurbo pa nga makusog nga bagyo yana nga tuig, sugad han Bagyong Opong nga duro nga nakaapekto ha Bicol region.
