TACLOBAN CITY – Nagpahimatngon an Department of Tourism Eastern Visayas ha publiko kasumpay han tiarabot nga dry season kun diin ginlalauman an pagdamo han mga turista nga mga mabisita ha rehiyon labi nga tiarabot gihapon an Semana Santa.
Sumala kan Department of Tourism-Eastern Visayas Regional Director Karina Tiopes, kinahanglan nga magin hydrated o uminom hin damo nga tubig o magbalon, kun malakat ha mga panimalay agud malikayan an heat stroke.
Importante gihapon an pagbubutang hin mga sunscreen o sunblock agud maproteheran an panit ha duro nga kapaso han panahon, ngan an pagdadara hin basic kits in kaso igkahituman o maka-eksperyensya hin mga dire ginlalauman nga panhitabo.
Nanawagan gihapon hi Tiopes ha mga lokal nga pangobyernuhan nga magpalusad hin mga pahimatngon ha kada tagsa nga lugar para han pagkakamay-ada hin mahimyang ngan hapsay nga dry season sugadman in ma-monitor han mga ine an mga tourism sites nga bibisitahon han mga turista.
Samtang, para naman ha mga mabisita ha rehiyon in mayda QR code nga nga ginpagawas an DOT pinaagi han Facebook page hine agud mabuligan an mga turista nga makapili han ira karuyag kadtuan nga mga lugar ha rehiyon, sugadman han magkaduru-dilain nga aktibidad nga pwede ma-ekperyensyahan han mga ine samtang nagbabakasyon, ngan kaupod gihapon an mga numero han PNP, BFP, DOT, Hospitals para ha pagresponde han mga panhitabo. (Bombo Niña Magpili)
