TACLOBAN CITY – “Deemed as aprroved” o igkokonsidera nga aprubado na dayun an mga permit, lisensya, clearance, ngan iba pa nga dokumento nga dire maa-aprubahan ha sulod hiton nakatalaan nga kaiha hiton adlaw nga nakasurat ha Citizen’s Charter.
Sumala kan Atty. Jerry Uy, City Councilor hiton Tacloban City, mayda balaod nga gintatawag Ease of Doing Business and Efficient Delivery of Government Services kun diin an pinakasimple nga request in kinahanglan nga matagan hin aksyon ha sulod hin 3 business days, kun komplikado naman in ha sulod hin 7 business days, ngan kun highly technical in maabot ha 20 business days.
Sugad daw han kanan Pintados Foundation Inc. nga request ha pagparada ha syudad, para haiya in kaya daw ine maaprubahan ha sulod la hin 3 business days ngan bisan paman daw kun himuon ine nga komplikado in maabot la ha 7 business days an pag-apruba pero dire ine maiko-konsidera nga highly technical mahitungod nga permit hin pagparada manla ine.
Subay manggud ha Section 10 hiton RA 11032 o Ease of Doing Business and Efficient Delivery of Government Services, kun dire ngani maaprubahan ha sulod han nakalataan nga kaiha han adlaw an ginre-request nga permit o lisensya in otomatiko ine nga maa-aprubahan [provided] nga naisumite hine an ngatanan nga kinahanglan nga dokumento ngan nabayaran an ngatanan nga kabaraydan. An acknowledgement receipt kaupod an official receipt han mga gin baydan nga mga kabaraydan in may-ada kaparehas nga bisa sugad han otomatiko nga pag-apruba.
Manunumduman nga sumala kan Eugene Tan, Presidente hiton Pintados Foundation Inc. in Marso pala han presente nga tuig in nagpasa na hira hin request kasumpay han pagparada ha syudad pero hasta ngada yana in waray pa ine kabatunan.
