NATIONAL- Nagpahimatngon an Department of Health (DOH) ha publiko agud nga malikayan an mga sakit nga dara hiton Amihan nga panahon.
Sumala ha ahensiya, pira ha mga komon nga sakit yana nga panahon han Amihan an hiranat, sip-on, pulmonya, allergic rhinitis, ngan dry skin nga durot hiton mahagkot ngan mamara nga hangin.
Para malikayan an sakit sugad hiton hiranat ngan sip-on, pasabot han DOH nga maghugas han kamot, pumahuway ha panimalay kun mayda mga sintomas ngan kumaon hin mga prutas ngan utanon.
Para naman ha allergic rhinitis, magsul-ot hin face mask kun ada ha gawas o maalikabok, limpyuhan an libong ngan uminom hin antihistamine kun kinahanglan.
Para malikayan an Atopic dermatitis o eksema, kinahanglan nga gumamit hin moisturizer kada adlaw, likayan an madugay nga pagkarigo ngan siguraduhon nga hydrated.
