NATIONAL – Gin sigurado han Department of Health (DOH) nga waray na babayaran an mga pasyente ha basic accomodation ha DOH hospitals.
Ine in subay ha direktiba ni Presidente Ferdinand Marcos Jr. ha ikaupat nga State of the Nation Address (SONA).
Ha iya report ha nasud, gin anunsyo han Presidente nga igpapatuman na an zero-balance billing agud maibanan an pas-anun han mga pasyente nga nanginginahanglan hin medikal nga pag-atiman.
Ginmalatumat gihapon han Presidente nga libre na an serbisyo ha basic accomodation ha mga hospital han DOH sanglit waray na babayaran an mga pasyente.
Pinondohan an nasabi nga bulig-medikal han Medical Assistance to Indigent and Financially Incapacitated Patients (MAIFP), Philippine Charity Sweepstakes Office (PCSO), Philippine Amusement and Gaming Corp. (Pagcor), ngan alokasyon nga pondo han DOH.
Ine in kadugangan pa ha suporta nga pinansyal tikang ha Philippine Health Insurance Corporation (PhilHealth).
Ha usa nga pahayag, ginkumpirma gihapon han DOH nga kumo kadugangan nga bulig para ha mga pasyente nga nanginginahanglan hin pambayad para ha ira mga hospital bill, ig uupod na gihapon ha e-Gov application an pagproseso han Medical Assistance to Indigent and Financially Incapacitated Patients (MAIFP) program.
Ine in agud himuon nga mas unified, madagmit, transparent, ngan accessibile an mga medikal nga bulig ha oras han panginahanglan han mga pasyente.
Ha post-State of the Nation Address (SONA) forum han mga opisyal han ahensya han gobyerno, gin klaro ni Health Secretary Ted Herbosa nga libre na para ha ngatanan an basic accomodations basta ha mga hospital han DOH pero kun ha mga pribado nga hospital in mayda bayad.
Sumala pa ha sekretarya, han una, an mga indigent o membro la han 4Ps an sakop han zero-balance billing.
Iginparayaw gihapon hhine nga 40 tikang ha 83 nga hospitals han DOH in air conditioned na an mga ward.
