TACLOBAN CITY– Maabot ha 13,500 nga mga benepisyaryo an nakatagam-tam ha bug-os nga rehiyon, han libre nga serbisyo han Department of Health (DOH) Eastern Visayas, ha kahuhuman la nga Bagong Pilipinas Serbisyo Fair Regionwide Implementation.
Sumala kan Jelyn Lopez Malibago, Information Officer han Department of Health (DOH) Eastern Visayas, nga ha ira pakiki-usa han Bagong Pilipinas Serbisyo Fair Caravan, nga gindumara naman ha maglain-lain nga lugar ha rehiyon, malipayon hira nga igpahibaro ha publiko, nga nagkamayda hira hin mahinungdanon nga papel ha paghatag hin damo nga mga serbisyo ha panlawas ha komunidad.
Dugang pa ni Lopez, pira ha ira ginhatag nga serbisyo an mga masunod; Medical Consultations in Family Medicine, Ear, Nose, and Throat (ENT), Internal Medicine, Surgery, Obstetrics and Gynecology, Pediatrics, and Ophthalmology; Dental services; Vaccination; Laboratory Services upod an X-ray, ECG, blood tests, urinalysis, ngan iba pa. ; Vision Screening ngan paghatag hin preskripsyon nga mga salamin ha mata, pag-eksamin ha HIV; ngan paghatag hin mga gamit ngan medisina.
An Bagong Pilipinas Serbisyo Fair usa nga programa han administrasyong Marcos, nga an tumong an pagpauswag han pag-access han publiko ha mga serbisyo han gobyerno pinaagi han pakikipagsumpayan han mga ahensya han gobyerno.
Gintagan naman hin duon han mao nga tagapagyakan, nga an DOH-EVCHD in nagpapabilin nga madig-on ha iya misyon ngan naghahatag hin garantiya ha universal access ha kalidad han panlawas ha Eastern Visayas.
