TACLOBAN CITY – Aminado an Department of Health (DOH) Regional Office 8 nga ha kaluyo han kamapaso han panahon durot han El Niño in mayda la gihapon nahihipatik nga mga kaso hin dengue ha rehiyon.
Sumala kan John Paul Roca, tagapagyakan han DOH 8, mauran man o masirak in padayon la gihapon nga nadudugngan an dengue cases ha Eastern Visayas kun diin ha pagkayana in maabot na ha 3,425 an nahipatik nga kaso ngan 15 ha mga ini an naawatan hin kinabuhi.
Ini naman in mahitungod ha kapaso han panahon nagkakaada hin problema ha suplay han tubig kun diin an pipira in nagsasalud hin tubig ngan nangangalimtan pagtakop hini nga posible pagbonayan o balayan hin namok.
Ha kaluyo naman han hitaas nga ihap han dengue cases ha pagkayana in waray pa naman hini kalabwi an epidemic threshold ngan alert threshold ha rehiyon ngan padayon an ira monitoring hini.
Padayon gihapon an ginbubuhat nga health advisories han DOH agud nga maipasabot ha publiko an mga kinahanglan nga buhaton para malikayan an paghitaas pa han ihap han kaso hin dengue ha rehiyon.
