Iginduduso han Department of Health (DOH) an total ban ha paggamit han vape o e-cigarettes mahitungod ha hulga hini ha panlawas han publiko.
Sumala kan OIC-Director III han DOH Health Promotion Bureau Dr. Dominic Maddumba, panuyuan han nasabi nga balaod an padayon nga ig diri o ipagbawal an paggamit han vape agud malikayan an diri maupay nga epekto hini ha kalawasan.
Ha kaluyo hini, kun diri matutuman an total ban, igin suhestyon han DOH nga magpatuman hin mas mahugot nga regulasyon, kaupod na an pagtanggal han iba-iba ng ma flavor han vape products.
Pag eksplikar pa ni Dr. Maddumba, an mga flavored vape an nakakaengganyo ilabi na ha mga kabataan rason kun kay ano angay la nga himuon ini kaparehas han tobacco products.
Una na nga naghatag pahimatngon an DOH nga an paggamit han vape ngan iba pa nga mga produkto tabako in puydi mag durot hin iba-iba nga sakit sugad han cardiovascular disease, cancer, ngan mga problema ha baga.
Samtang, padayon naman nga gin eestudyohan han ahensya an mga pitad agud maproteharan an kalawasan han publiko ilabi na ha mga kabataan kontra ha peligro han paninigarilyo ngan vaping.
