TACLOBAN CITY– Ginkumpirma hiton Department of Health Regional Office Vlll, an syahan nga kaso hiton monkeypox dinhi ha rehiyon.
Una hine, ginkompirma gihapon han alkalde hiton Sogod, Southern Leyte Mayor Sheffered Tan, nga nahipatik hiton ira bungto an kaso hiton moneypox.
Sumalan kan Princess Debbie Garcia, Information Officer Designate, Department of Health Regional Office Vlll, ine mangud in alinsunod ha ginpapatuman nga RA 11332, or the “Mandatory Reporting of Notifiable Diseases and Health Events of Public Health Concern Act”, kun diin ginatatagan hin katungod adton mga local government units nga mag-anunsyo kun mayda nahihipatik nga mga diseases ha ira lugar.
Dugang pa ni Garcia, an pasyente nga natapnan hine nga monkeypox in usa nga 28-anyos an pangidaron ngan residente hiton Brgy. Zone 2 han Sogod Southern Leyte.
Ginpaangbit pa ni Garcia, nga mahuman nga mahisabtan an pira nga mga sintomas han virus, in dayon naman ine nga gin-isolate agud nga dire na makapanapon.
Ginmalatumat naman ni Princess Debbie, an proseso hiton pagkompirma han nasabi nga virus, ine in maagi anay hiton swab-test, ngan kukuhaan an suspected person hin sample ngan igpapadara an mga ine ha ira main office ha Manila Research Institute for Tropical Medicine.
Dugang pa hine, an nasabi nga sample in igpapailarom pinaagi hiton confirmatory testing, kahuman in maghuhulat an ira buhatan nga gumawas an resulta.
Ginpahayag pa ni Debbie nga dire sugad kadagmit an pagpadara hin resulta matungod nga ginpapadara ine pinaagi hiton hard copy document, kumo official result han nasabi nga panginano.
Mababaruan, nga kalakip nga naka-abat hin sintomas an mga kaupod hine ha panimalay, sugad han 9-anyos nga bata ngan sugadman an iya asawa.
