NAVAL, BILIRAN – Magkakamay-ada na hin direkta nga koneksyon pandagat an Naval, Biliran tikadto ha Matnog, Sorsogon mahuman an pagharampang ha butnga han lokal nga opisyal han San Ricardo Shipping Lines Corporation para ha pinal nga plano han bag-o nga maritime corridor.
Subay ha Facebook post han kumpanya dida han Hwebes, an serbisyo in pagbubuhaton han M/V Owen Gian 1, an pinakasyahan nga brand-new roll-on/roll-off (RoRo) vessel han kompanya.
Ginbabana-bana nga ada ha 70 ngada ha 80 nautical miles an direkta nga distansya ha dagat ha butnga han Port of Naval ngan Matnog.
Ha presente, naagi pa ha Cebu an mga pasaheros ngan kargamento tikang ha Biliran nga tikadto ha Matnog, nga nagdudurot naman hin mas halaba nga oras han biyahe ngan dugang nga gastos.
Ginlalauman naman nga magpapakusog an bag-o nga ruta han agos han kalakalan ha butnga han Southern Luzon ngan Eastern Visayas, labot pa ha paghahatag hin mas madagmit nga alternatibo para ha mga pasaheros ngan freight services.
Nakighampang na gihapon ni Naval Mayor Gretchen Espina hi mga opisyal han shipping operator nga nakabase ha Surigao kasumpay han nakatalaan nga paglulunsar ha Marso han ruta nga Matnog, Sorsogon – Naval, Biliran – Calubian, Leyte.
Ha usa nga pahayag, ginmalatumat han lokal nga gobyerno nga an bag-o nga shipping route an ginlalauman nga magpaparibhong an aktibidd pan-ekonomiya, magpapaupay ha accessibility, ngan mas magpaparig-on han inter-island connectivity ha Visayas region.
