TACLOBAN CITY – Papatikangan yana nga adlaw an deployment han mga kapulisan ha siyudad han Tacloban ha mga pampubliko ngan pribado nga sementeryo.
Ine in may paghisumpay ha igpapatuman nga mga aludayday para ha pagbisita ha mga sementeryo yana nga tiarabot nga todos los santos.
Sumala kan Pol.Capt.Marjorie Manuta tagapagyakan han Tacloban City Police Office nga 24 oras nga nakabantay an mga kapulisan ha mga sementeryo pero magtitikang la ha alas 8 han aga kutob alas 5 han kulop an pagpapasulod.
Aada la gihapon ha 30 porsyento tikang ha maximum capacity an tutugutan agud nga dire maghuroot ha sakob han sementeryo.
Kinahanglan naman nga magsunod la gihapon ha health protocol sugad han padayon nga pagsul-ot hin face mask ngan face shield,ngan magdara hin ID card,ngan QR code.
Ginaghat naman hine an publiko nga dire na magdara hin pagkaon,gambling materials,speaker ngan makahurubog nga irimnon.
