NATIONAL – Gintanggal han Department of Education an aada 55 nga eskwelahan tikang ha Senior High School voucher program mahitungod ha isyu kasumpay ha daw “ghost students” o nonexistent students.
Ini in ginmalatumat ni DepEd project manager III, Tara Rama han pakianhan ni Kabataan Partylist Rep. Raoul Manuel kasumpay ha eksakto nga ihap han mga daw ghost student ha pagdungog han House Committee on Basic Education and Culture.
Sumala kan Rama, aada ha 22 nga ekswelahan an na-terminate ha programa dida han school year 2021-2022, 32 naman dida han SY 2022-2023, samtang usa naman an na-terminate dida han SY 2023-2024. Mayda 12 gihapon nga eskwelahan an under investigation.
Ginpakiana gihapon han mambabalaud kun pira nga vouchers an ginhatag ha nasabi nga mga eskwelahan, pero ginklaro ni Rama nga waray na ginpagawas han DepEd an P200M nga kantidad han vouchers mahuman makita an discrepancies tikang ha mao nga eskwelahan.
Manunumduman, nga ginrolyo an mao nga programa dida han tuig 2015 ha panuyuan nga himuon nga mas magin accessible an SHS education ha mga kablas nga estudyante ngan maibanan an paghuruot ha mga pampubliko nga eskwelahan ha pamamaagi han paghahatag hin vouchers para makapag-enrol ha private institutions.
