Gin bay-og hin magnitude 6.3 nga linog an norte nga dapit han nasud Japan kagab-i, Biyernes, sumala ha Japan Meteorological Agency (JMA).
Nahinabo an pag bay-og han tuna banda alas-8:22 han gabi ha kadagatan nga parte han Miyagi Prefecture.
Ha kaluyo hini, waray naman may igin pagawas nga tsunami warning sugad man waray gihapon naitala nga ka guba han mga establishemento mahuman an mao nga linog.
An mao nga pag bay-og in kasunod han magnitude 7.7 nga linog nga umigo ha kapareho nga rehiyon dida han bulan han Abril.
Samtang, nagpahimatngon naman an JMA nga posible la gihapon makaeskperyensya hin mas makurokusog nga pag bay-og hin tuna ha mao nga lugar ha kaluyo han pagkakatanggal han nahi-una na nga earthquake advisory.
Samtang, igin malatumat naman han state broadcast nga NHK nga waray may nahipatik nga abnormalidad ha mga nuclear power plant ha Miyagi ngan ha mga kahigrani nga Fukushima Prefecture.
Mahitungod han na eksperyensyahan nga linog, in temporaryo nga igin undang an operasyon han Shinkansen bullet trains, subay ha East Japan Railway.
Mababaruan nga mahikikit-an an Japan ha gin tatawag nga Pacific “Ring of Fire,” rason kun kay-ano sukot ini makaabat hin pag bay-og hin tuna.
