NATIONAL–Ginaprubaran han Deparment of Education (DepEd) an upat ka adlaw nga work week para ha non-teaching personnel nga natrabaho onsite kada semana tikang han Lunes, Marso 9, 2026.
Sumala ha ginpagawas nga memorandum ni Education Secretary Sonny Angara han Marso 8, an Biyernes in igooberseba kumo ordinary work-from-home day para ha ngatanan nga sakop hiton departamento.
Kahuman ine han direktiba ni Pangulong Ferdinand Marcos Jr. nga magpatuman hin energy conservation measures ha ngatanan nga buhatan han gobyerno mahitungod ha naghihitaas nga presyo hiton lana kasumpay ha krisis ha Middle East.
Nakailarom ha departamento an non-teaching ngan related-teaching personnel, pati na an mga contract-of-service ngan job order employees, samtang an mga magturutdo in magpapadayon naman ha ira regular nga klase ngan iba pa nga aktibidad.
Kadungan ha upat ka adlaw nga onsite arrangement, ginmando gihapon han DepEd an mga pitad ha pagtitipid hin enerhiya agud nga maibanan an consume hin kuryente ngan gasoline hin 10% kutob 20%.
Kalakip didi an pag-set han arcon ha 24°C, paggamit hin sleep mode ha gamit, pagtanggal hin suga ngan electronics nga dire kinahanglan ha buhatan kada lunch break ngan mahuman han opisina, ngan paggamit hin hagdan kumpara ha elevator.
Ginmando gihapon han DepEd nga an mga itner-agensy meetings, konsultasyon ngan conference in buhaton ha virtual platform labot la kun kinahanglan, ngan an mga opisyal nga travel in limitado la ha importante o kritikal nga responsibilidad kun dire kaya ha online meeting.
