EASTERN SAMAR – Nagpatapod an Department of Education-Eastern Samar nga masuporta hira ha mga pitad nga igpapatuman agud magin mahimyang ngan hapsay an 2025 National and Local Election.
Sumala kan Schools Division Superintendent Gorgonio Diaz Jr. durante han Solidarity Pact Signing han Eastern Samar Police Provincial Office, dako an papel han edukasyon ha pagpabilin han democratic values, civic responsibility, ngan voters’ awareness.
Dugang pa hine, an magturotdo, school heads, ngan non-teaching personnel in kasugbong ha pag-edukar han botante pinaagi han classroom discussions, community engagement, ngan information campaigns.
Damo gihapon nga supervisors, administrators, ngan teachers an magsi-serbi ha election process nga magbabantay han seguridad, magpupugong han panlimbong, ngan magsisiguro han integridad hiton eleksyon.
Nagpahayag gihapon hin kompiyansa hi SDS Diaz nga an ngatanan nga magsi-serbi ha eleksyon sugad hiton Department of Education, Philippine National Police, ngan Commission on Elections in magbubuhat han ira katungdanan nga may integridad para naman hiton tidaraon nga 2025 midterm elections. (via Bombo Shiela Encio)
