TACLOBAN CITY – Ginklaro han Department of Education (DEPED) Regional Office 8 nga waray kaso hin massive dropout hin mga estudyante ha rehiyon yana nga school year 2020-2021.
Sumala kan Jasmin Francisco Calzita, tagapagyakan han DEPED 8, ha kaluyo han distanced learning nga ginpapatuman mahitungod han COVID-19 pandemic, waray naman datus nga nagpapakita nga damo nga mga estudyante ha rehiyon nga waray magpadayon pag-eskwela yana nga tuig.
Ha kamatuoran daw in mas paborable ini para ha mga estudyante tungod nga an pag-aram han mga ini in ha ira la mismo mga panimalay.
Ginklaro gihapon hini nga kun may mga estudyante nga dire nakakagsumiter hin modules ha sakto nga oras in dayon ini nga ginpa-follow up han mga teachers agud nga matagaan hin kaangayan nga bulig ngan interbensyon.
