NATIONAL NEWS– Gin-aprubaran han Department of Budget and Management (DBM) ha pangunguna ni Secretary Amenah Pangandaman an 16,000 nga mga bag-o nga teaching positions ha mga pampubliko nga eskwelahan para ha School Year (SY) 2025–2026, kumo baton ha direktiba ni Pangulong Ferdinand Marcos Jr. nga pakusgon an sektor han edukasyon.
An 16,000 nga bag-o nga posisyon in kaparti han syahan nga tranche han target nga 20,000 teaching positions para han presente nga tuig.
Ha lain nga bahin, 15,343 han mga bag-o nga posisyon in Teacher I (Salary Grade 11).
An mga teaching post para ha Senior High School in igbubutang ha division level para ha mas flexible nga deployment, alinsunod ha aludayday nga ginpatuman han DBM han tuig 2016.
Sumala kan Secretary Pangandaman, an nasabi nga pitad in suporta ha Department of Education (DepEd) nga agud nga mapakusog an workforce ha Kindergarten, Elementary, Junior High School, Senior High School, ngan Alternative Learning System (ALS).
Ginbabana-bana nga maabot ha P4.194 billion an pondo nga gin-alutaga para ha bag-o nga posisyon nga magtitikang ha built-in appropriations han DepEd ha ilarom han 2025 General Appropriations Act.
