DARAM, SAMAR – Padayon ngan mahugot an ginbubuhat nga pagbabantay han mga kapulisan han Daram Municipal Police Station ha mga merkado kasumpay han Red Tide Poisoning.
Sumala kan Daram Municipal Police Station, Chief of Police PLTCOL Norman Ala, nga tikang han nagpalusad hin red tide warning an Bureau of Fisheries and Aquatic Resources VIII dida han Setyembre 25 in mahugot an ira pagbabantay ha mga merkado.
Mahugot gihapon an ira pagbabantay ha mga pantalan basar ha kamanduan nga iginpalusad haira tikang ha lokal nga pangobyernuhan han Daram agud nga masigurado nga waray may magbabaligya, magdedestribwer, ngan mamamalit hiton mga panti-on nga apektado han mao nga red tide.
Dugang han opisyal nga basar han impormasyon nga ira nakuha, nga an nakonsumo nga panti-on han mga biktima nga taga Brgy. Parasan Daram, Samar in daw napalit han mga ini dida han Setyembre 24, adlaw ugsa mag-isa an BFAR-8 han warning.
Samtang, ginmalatumat naman han opisyal nga ha pagkayana in padayon na nga nagpapaupay an mga nasabi nga biktima kun diin, naka-admit na an mga ini ha Samar Provincial Hospital.
Manunumduman nga nakapaghipatik dida han mga nakalabay nga adlaw an BFAR-8 hin maabot 26 nga mga biktima han red tide poisoining kun diin, 82-anyos an pinakalagas ngan 12-anyos naman an pinakabata nga naireport nga nahilu-an matungod ha kontaminado nga panti-on.
