NORTHERN SAMAR — Naglalaum an Philippine Coast Guard (PCG) nga damu an mga mabiyahe ha ruta nga Sorsogon-Northern Samar yana pagsaurog han Undas.
Sumala kan ENS James H. Espejo, Acting Deputy Commander han Coast Guard Station Northern Samar, nakapagtala hira hin 1,310 nga outbound passengers tikang ha Northern Samar tikadto ha Sorsogon, samtang 1,900 naman nga inbound passengers an umabot tikang ha Sorsogon tikadto Northern Samar.
Ginpahayag ni Espejo nga dida han nakalabay nga tuig umabot an peak han ihap han mga pasahero ha 1,600.
Dugang pa ni Espejo, kasagaran nga na-biyahe an mga pasahero kon Biyernes ngan Sabado, sanglit ginlalauman nira nga maabot hin 1,500 an ihap han mga pasahero, nga kadam-an in tipakadto ha Northern Samar. Ginlalauman liwat nga damu an magigin outbound passengers tibalik ha Sorsogon ha Nobyembre 3, kahuman han Undas.
Samtang, gin-aghat ni Espejo an publiko nga regular nga magmonitor han opisyal nga social media page han Coast Guard District Eastern Visayas para ha mga pahibaro mahitungod han kahimtang han mga biyahe, diri la ha Northern Samar kundi ha bug-os nga Eastern Visayas, agud malikyan an posibilidad nga ma-stranded ha mga pantalan.
