TACLOBAN CITY – Padayon pa an gindudumara nga validation han Department of Agriculture (DA) Regional Office 8 ha mga magiging benepisaryo han fuel subsidy program para han mga corn farmers ha rehiyon.
An mao nga P3,000 fuel subsidy program in kumo ayuda han gobyerno ha araba han magkadirudilain nga sektor kaupod na an mga parag-uma ngan parupangisda ha padayon nga paghinitaas han presyo han produktong petrolyo ha nasud durot han krisis ha Ukraine ngan Russia.
Sumala kan Christine Colasito, Information Officer han DA Regional Office 8, tubtob ha maabot nga Marso 31 an ira pagvalidate han mga benepisaryo nga mga parag-uma hin mais o corn farmers nga apektado gihapon han hitaas nga oil prices tungod han ira mga gingagamit nga mga makina ha ira pag-uuma.
Nahibaruan nga mayda naman kinada tuig nga ayuda para han mga rice farmers ha rehiyon pinaagi han Rice Farmers Financial Assistance program nga nauna na nga iginhatag ngan magpapadayon ha sakob hin lima katuig.
