TACLOBAN CITY– Padayon an gindudumara nga contact tracing han Eastern Visayas State University main campus, kasumpay han kumpirmado nga Hand, Foot, and Mouth Disease (HFMD) ha Secondary Laboratory School (SLS).
Sumala kan Jenette Ruedas,Information Officer Eastern Visayas State University, ha pagkayana suspendido na an klase magin ha college level han nasabi nga eskwelahan, kutob ha adlaw hiton Biyernes.
Dugang pa hine, kalakip ha mga dire ginpapasulod ha school premises, an mga High School Teachers, kun diin nadiskubrehan an virus.
Mababaruan nga maabot ha 5 nga estudyante an natudlok nga nagpositibo han nasabi nga virus, ngan ha pagkayana nagdudumara na hira hin contact tracing ha mga posible, nga nakahibalag han mga ine.
Ginmalatumat pa ni Ruedas, nga tanan nga classrooms in magkakamayda hin disinfection agud nga masigurado an katalwasan han mga estudyante, ngan mga magturotdo, pananglitan nga mag resume na an klase.
Manunumduman nagpagawas hin abiso an nasabi nga buhatan nga magkakamayda la anay hira hin online ngan asynchronous class tinikangan Oktubre 6-10 yana nga bulan, samtang ginlalauman naman nga mabalik an tanan nga face to face classes ha adlaw hiton Lunes, Oktubre 13, 2025.
