Gin depensahan ni Tingog Party-list Rep. Jude Acidre an daw ”bagman” ni Vice President Sara Duterte nga hi Ramil Madriaga, kun diin iginduon han magbabalaod nga matuod-tuod an mga alegasyon hini kontra ha Bise Presidente kasumpay han ginkakatubang nga reklamo nga impeachment.
Sumala kan Acidre, an supplementary affidavit ni Madriaga in detalyado ngan makuri imbentuhon mahitungod ha kadamo han impormasyon nga ginlatag hini. Ginmalatumat gihapon hini nga klaro ngan padayon an pahayag ni Madriaga nga nagpapakita hin halaram nga hibaro hini.
Dugang pa han Kongresista nga mayda direkta nga hibaro hi Madriaga ha mga ginpapahayag nga transakyon mahitungod suok hini nga koneksyon kanda VP Sara Duterte ngan tatay hi ng nga hi anay Presidente Rodrigo Duterte.
Manunumduman nga umatbuang hi Madriaga ha pagdungog han House Committee on Justice dida han Abril 14 kun diin ginsalawad niya an iya 24opages nga sworn statement.
Sulod hini an mas detalyado nga bersyon han iya nauna nga affidavit nga gumawas na ha publiko dida han nakalabay nga tuig.
Dugang pa han magbabalaod, nagpakita gihapon hi Madriaga hin mga ebidensya sugad han mga tseke nga litrato agud suportahan an iya mga pahayag.
Sugadman, gin kwestyon han pira nga magbabalaod an kredibilidad ngan motibo ni Madriaga mahitungod nga ini in presente nga nakapreso ha ilarom han Bureau of Jail Management and Penology ha Camp Bagong Diwa ha Taguig.
Sumala kan Acidre, mas nagigin mabug-at an mga alegasyon kun igkonsidera an mga nauna nga audit findings nga nag-flag hin kakulangan ha dokumentasyon han paggamit han confidential funds han Office of the Vice President.
Labot pa hini, nanumpa daw gihapon hi Madriaga ngan nagsumite pa hin waiver of bank secrecy, nga nagpapakita hin kaandaman hini nga pamatud-an an iya mga ginpapahayag.
