TACLOBAN CITY – Nananawagan an Commission on Election (COMELEC) ha publiko nga magparehistro hin timprano agud nga malikayan an paghuruot han katawhan ha ira mga buhatan.
Una hini, yana nga adlaw utro nga gintikangan an voter’s registration para ha May 2022 national ngan local elections kun diin mahagos an rehistrasyon tubtob hiton bulan han Setyembre yana nga tuig 2021.
Sumala kan Atty. Jose Nick Mendros, Regional Director han COMELEC Regional Office 8, abre an tanan han ira mga buhatan ha rehiyon tikang alas 8 hit aga tubtob alas tres hiton kulop, Lunes ngada Huwebes, labot la ha mga lugar nga ginpailarom ha lockdown sugad han bungto han Guiuan, Eastern Samar.
Dugang pa ni Atty. Mendros, ginlalauman nira an hitaas nga voters turnout sanglit ira ginsasagdun ha publiko nga magtimprano pagparehistro agud nga dire maghuruot ha ira mga buhatan ngan makalikay ha hulga han COVID-19.
Nanawagan gihapon ini ha mga magpaparehistro nga magsunod ha mga health protocols sugad han pagsusul-ot hin face mask ngan face shield.
Agud nga madagmit nga ma-accomplish an application forms, pwede nga gumamit hin application nga iRehistro an mga aplikante.Pero kinahanglan la gihapon nga personal nga kumadto han mga registrants ha mga local COMELEC offices ngan kinahanglan gihapon nga magdara hin tulo nga kopya han printed online application forms.
