TACLOBAN CITY – Ginpahimatngunan han City Housing Tacloban an publiko ala-kontra ha gin-aalegar nga nangongolekta o nag-fifixer hin pabahay gamit an ngaran han mao nga buhatan ngan National Housing Authority NHA.
Sumala kan Ted Jopson, Head han City Housing Tacloban, nga mayda hira nakarawat nga report nga nagagamit ngan nagpapakilala nga tinaglawas hiya han City Housing, kun diin nagigin fixer ine han mga pabahay.
Gintagan naman hin klaro han mao nga opisyal, nga waray kalabutan an ira buhatan ha ginhihimo nga pan-fixer han mao nga indibidwal, kun diin ine in usa nga scam.
Ginmalatumat pa han mao nga opisyal, nga subay ha ira nakuha nga imporamasyon tikang ha mga nagin biktima han mao nga scam ngan pan-fixer hiton pabahay, nga mayda ine ginrepresentar ha ira nga mga litrato han mga abandona nga pabahay kun diin ginkuha la hine an mao nga litrato ha social media agud gamiton nga pan-nguwat ha katawhan.
Nanawagan naman an mao nga buhatan ha publiko, nga maghirot ngan dire dayon nga tumuod ha mga indibidwal nga napakadto ha iya mga panimalay, ngan nagpapakilala nga tinaglawas hiton usa nga ahensya han lokal nga pangobyernohan kun waray ine maipapakita nga sandang nga mga dokumento ngan lisensya nga tinuod ine ngan dire usa ha mga nahurak yana nga mga scams.
