TACLOBAN CITY – Malipayon nga nakakarawat han ira mga papremyo ngan sugad man consolation prizes an mga nagdaog han pinakasyahan nga Christmas on Wheels han City government han Tacloban kasugbong an TNT Smart Communications.
Una hini, an mao nga Christmas on Wheels competition in usa nga paisan-isan han mga pampasaheros nga mga sarakyan ha syudad sugad han mga jeep ngan multicab kun diin an mga ini in nagpaupayay hin disenyo ngan christmas lights ha ira mga sarakyan.
Sumala kan Bardot Atillo, head han Tacloban City Tourism Office, tanan han mga partisipante han mao nga paisan-isan in nakakarawat hin noche buena pack, katunga hin sako hin bugas ngan P3, 000 naman nga consolation prize.
Nakuha ni Roger Gaviola ngan Paul Jeymar Gaviola an grand prize nga maabot ha P20,000 samtang nag-ikaduha naman nga pwesto hira Edgar Cagara ngan Genovero Emnas Jr. nga nakakarawat hin P15,000.
Nag-ikatulo naman ha pinakamaupay na disenyo ngan lights an behikulo ni Ruth Mabay ngan Nick Anthony Nofies nga nag-uli han P10,000 nga premyo.
Gintagan gihapon special award nga Best Biyahero hi Jay Rojas ngan Joey Oreno nga nakakarawat liwat hin noche buena pack, half sack rice ngan P5,000 cash prize.
Ginpaplanuhan naman han city government nga pagdumaraon gihapon an Christmas on Wheels ha masunod nga tuig ngan naglalaum hira na madarudamo na an ihap han mga partisipante.
