TACLOBAN CITY – Patay an usa nga babaye samtang samaran an asawa hini mahuman nga bumangga ha usa nga panimalay an ginsasakyan nira nga Toyota fortuner ha national highway han Brgy. San Roque, Tolosa, Leyte.
Ginkilala an namatay nga biktima nga hi Maria Elisa Manatad samtang an asawa naman hini nga hi Romeo Manatad in padayon pa nga gintatambal ha ospital.
Sumala kan Pol. Capt. Michael Duran, hepe han Tolosa MPS, biyahe pa- Tacloban an mga biktima han tigda nala nga mawarayan hin kontrol an driver han manibela hiton sarakyan mahitungod han madalunot nga karsada durot han pag-inuran.
Ha pag iimbestigar pa han mga kapulisan, medyo malaksi an padalagan han drayber, usa liwat ira ginhihingita nga rason han pagbunggo hini ha balay nga gintatag-iyahan ni Aileen Umbal.
Waray naman may nadabi nga tawo ha sakob han panimalay pero nagkaada ini hin slight damages.
Gindara liwat dayon ha Leyte Provincial Hospital an mga biktima, pero humagos la hin pira kaminuto in gindeklara nga dead on arrival han doktor hi Ma. Elisa.
Accident prone area an lugar sanglit nagpahimatngon hi PCapt. Duran ha mga drayber nga maghirot ha pagmaneho ilabi na nga madalunot an mga kakarsadahan mahitungod hiton mauran nga panahon.
