NATIONAL – Ginsigurado ni Bureau of Plant Industry (BPI) Director Gerald Glenn Panganiban nga po-proteheran an lokal nga suplay han sibuyas ha kaluyo han utro nga pag-aangkat han nasud.
Dida han nakalabay nga Lunes in syahan na nga nahipatik han Department of Agriculture (DA) an pag-apruba ni Sec. Francisco Tiu Laurel Jr. ha pag-aangkat hin kabug-usan nga 16,000 metriko tonelada hin busag nga sibuyas agud mapugngan an posible nga pagsirit utro han presyo sugad han nahitabo dida han 2022.
Sumala kan Panganiban, sisiguraduhon han BPI nga an urhi nga adlaw han pag-abot han mga aangkaton nga sibuyas in ha December 31, 2024.
Ine in agud matagan hin proteksyon daw an mga domestic production o lokal nga produksyon han sibuyas han nasud.
Ginlalauman manggud nga magtitikang na an harvest season han mga sibuyas ha Pilipinas pag-abot han Enero 2025.
Ha pagsulod han Agosto 2024, mayda kabug-usan nga 99,519 MT nga pula nga sibuyas ha Pilipinas samtang an volume han busag nga sibuyas in umabot na la ha sobra 1K MT
Kun magpapabilin daw an habubo nga suplay o stocks han busag nga sibuyas in sigurado daw nga mahitaas gihapon an presyo kadungan han paghitaas han demand.
