TACLOBAN CITY – Gin tagan hin pasidungog kumo Best Radio Station ha bugos nga nasud an Bombo Radyo Philippines ngan an pira nga mga empleyado hini ha Bombo Radyo Tacloban ha kahuhuman la nga Pagdasig Awards 2025.
Ha tema nga Bylines and Frontlines: Honoring the Heroes Behind the Headlines, gintagan hin pagkilala han mga Taclobanon nga Communication students an mga reporters, writers, journalists, ngan storytellers ha national ngan local/regional nga category kumo pag hatag respito ngan importansya ha dedikasyon han mga ini ha pagbabalita hin tangkod ngan tinuod ha kumunidad ha kaluyo han ayat hiton fake news ngan red tagging.
Gin tagan pagkilala kumo Best Radio Station for National Category an Bombo Radyo Philippines, samtang an mga empleyado naman hini ha Bombo Radyo Tacloban in nagdaog kumo Best Online News Writer for female category hi Bombo Juvelyn Rancudo Ronato, Best Radio News Anchor naman for Male Category hi Bombo Max Monteza ngan Best Radio News Reporter for Female Category hi Bombo Niña Magpili, nakuha gihapon han Good Morning Philippines an Best Radio News Program.
Nagin manilampuson an pag hatag hin pasidungog ha mga media personalities mahitungod han pag burublig han tulo nga unibersidad ha syudad han Tacloban, amu an—an Leyte Normal University- BACommUNITY, Asian Development Foundation College (ADFC), ngan University of the Philippines- Tacloban College pinaagi han mga communication students han nasabi nga mga eskwelahan.
Ha pakikipaghimangraw han Bombo Radyo Tacloban kan BACommUNITY Adviser Professor Eva Rosal, nabug-os an PAGDASIG Awards dida han tuig-2021 agud tagan hin pasidungog ngan pagkilala an mga media personalities ngan media organization ngan agud ig selibrar an mga abilidad ngan ig boost an potensyal nga kakayahan han mga aspiring journalists ha syudad.
An Pagdasig in usa nga bisaya pulong nga nangangaruyag-sidngon hin paghahatag hin inspirasyon ngan motibasyon ha mga kabataan nga journalists nga mag padayon ha ira mga hingyap ha kinabuhi labi na an mga nagpa-plano pag sulod ha media industry.
