TACLOBAN CITY – Ginanunsyo han pamunuan han Biliran Province State University (BIPSU) nga magpapatuman hira hin two-shifting class system ha tiarabot nga Academic Year 2024-2025.
Sumala kan Dr. Victor Cañezo Jr, University President, Biliran Province State University nga ira ginduduso an mao nga magigin sistema mahitungod nga nag uusahan la nga Higher Education Institution ha probinsya ngan ha 3rd District han Leyte in naobserbaran nira nga nagtitikahitaas an ira nahihipatik nga mga numero nga nagpapaenroll.
“So as per our current classrooms and laboratory rooms, we could only accomodate 5,700-6,000 students as our capacity sa university. Since damo an nagpapaenroll yana and gusto na masulod ha university even right after the pandemic nag double an atun enrollment because one reason ay yung nag free tuition tayo kung kaya ang daming pumasok sa university.”
Dugang pa ni Cañezo nga an ira panuyuan in maakomodar an mga estudyante han BIPSU nga maabot ha 11,000-12,000 nga mga estudyante ha masulod nga Academic Year.
Magtitikang an 1st shift ha ala-7 han aga kutob naman ala-1 han kulop, samtang an 2nd shift naman in matikang ha ala-1 han kulop kutob ala-7 han gabi nga kun diin, nakadepende naman ini ha department o kun college.
Nakikita naman ini hiya nga ira igpapatuman nga sistema nga makakabenepisyo gihapon an mga estudyante mahitungod nga magkakaada hira hin oras para liwat buhaton an iba nga butang sugad nala han mga working student.
Ginklaro pa han opisyal nga kun masunod daw hira han ira kapasidad in diri hira nagkukulang hin mga classrooms, pero mahitungod nga gusto naman nira nga maakomodar an nga tanan in labi na adtun mga kablas in andam nira ini karawton.
“We know for a fact nga ito hira mga pobre liwat nga mga kabataan so they cannot even afford to go to Tacloban, Cebu or Ormoc. So hain man natun ini hira irerefer? Maupay man kun ada kami ha Tacloban kay puydi nga didto la kamo hini eskwela nga university or ini nga school. Waray man kami igrefer ha ira, ginkarawat namon hira. So magkaada kita hin two-shift.”
Ginpatapod pa gihapon ini nga diri daw makakaapekto an ira igpapatuman nga sistema ha kalidad naman han ira edukasyon, lugod in makakabulig pa daw ini nga maenhance an kada tagsa.
“In fact nakakaenhance sa atun pagprovide hin quality education kasi itun 2 hours nga face-to-face is actually after that may 1 hour pa ang bata to work sa kanilang mga activities, they will even learn to work independently, and even work with others.”
Target naman han pamunuan nga makapagtindog hin 100 nga mga panibag-o nga mga classrooms pag abot hitun 2027, nga posible naman hira makapag akomodar hin maabot ha 15,000 nga mga estudyante.
Ginpasabot pa hini nga para yana nga tuig in mayda hira P205-M capital outlay para hin duha nga buildings para han teacher education ngan school of management and entrepreneurship nga mayda naman lakip nga elevator system.
