BARUGO, LEYTE — Ginkilala an bungto han Barugo, Leyte komo usa han mga Regional Local Governance Champion ha 2026 Regional Local Governance Champion Assessment, tungod han padayon nga paningkamot nga mapakusog an institutional capacities, accountability ngan paghatag hin serbisyo nga nakasentro ha katawhan.
Sumala kan Barugo, Leyte Mayor Dr. Aron Balais, nakarawat nira ini nga pagkilala kasumpay han Seal of Local Governance, kun diin ha 41 nga mga bungto ngan syudad ha Leyte, 21 la nga mga lokal nga panggobyernohan an nakapasar ha assessment.
May-ada napulo nga mga criteria nga ginkikita han mga evaluators, upod an disaster preparedness, environmental management, health services, child protection ngan mga programa para ha senior citizens, sugad man an iba pa nga importante nga aspeto han serbisyo publiko.
Dugang pa ni Balais, kahuman hini nga regional assessment, magpapadayon pa an proseso ngadto ha national level, kun diin may oportunidad an mga nakapasar nga makakarawat hin Seal of Local Governance.
Samtang, ginpabug-atan han alkalde resulta ini han ira paningkamot kaupod an naglabay nga administrasyon, mga focal person ngan department heads. Bisan may mga kakurian hira nga ginkaatubang, dako an iya pasasalamat nga padayon hira nga nagbuburubligay para masiguro an maupay nga serbisyo ha katawhan.
