TACLOBAN CITY – Nagin malinampuson an gindumara nga Banka Rumba 2025 ha syudad han Tacloban kumo kaparte han ika-136 nga selebrasyon han kapatrunan han nasabi nga syudad.
Sumala kan Tacloban City Fishery Law Enforcement Team Coordinator, Felix Dumlao, mas damo an bumulig ha nasabi nga paisan-isan yana nga tuig kumpara han nakalabay nga tug-2024.
Dugang pa hine, mas damo gihapon an nagkita durante han paisan-isan mahitungod nga gin abrihan ha publiko an pagkita hine.
Ine naman na an ika-14 nga kabeses han pagdudumara hin Banka Rumba han syudad kada kapatrunan, kun diin syahan ine nga gintikangan dida han 2008 ngan naundang la dida han paglasurbo han STY Yolanda ngan durante han pandemya.
Samtang, ginkilala naman nga kampeon han Paddle Race (de-bugsay) hira Kent Kirby Villaseran ngan Manuel Reso, kun diin nag-uli an mga ine hin P20,000; nag ika-duha naman hira Gilbert Barrantes ngan Jeffrey Barrantes ngan nakag-uli hin P15,000; ika-tulo hira McDonald Villaseran ngan Jhon Lloyd Cabagui nga mayda liwat P10,000; ngan nag ika-upat naman hira Tony Latorre ngan Ramil Villaseran nga nakag-uli naman hin P8,000.
Ha lain nga bahin, nakuha ni Francisco Migdao an kampeonato han Regatta (de-layag) nga mayda premyo nga P20,000; nag ika-duha hi Jonathan Raz nga mayda naman premyo nga P15,000; ngan nakag-uli naman hin P10,000 an nag ika-tulo ha pwesto nga hi Noel Hakka.
Nagpasalamat naman hi Dumlao ha ngatanan han mga bumulig ha nasabi nga paisan-isan ngan nagpatapod nga tatalinguhaon nira nga ha masunod nga mga tuig in padadamuon pa nira an mga kategorya nga pwede buligan.
