TACLOBAN CITY – Ginpahayag han pira nga mga eksperto ha computer information and communication technology nga dako an maibubulig han ginlalauman nga bag-o nga satelllite internet service ha Pilipinas pinaagi han SpaceX Starlink labi na gud ha mga remote areas.
Sumala kan Dr. Cesar Silay, doctor of information technology ngan dean ha ACLC Tacloban, ha pagkayana in mayda na mga pagbabag-o ha internet service ha Pilipinas nga gin-establisar han Department of Information and Communication Technology (DICT) ngan ginlalauman nga mas mapapalaksi pa an internet speed ha nasud pinaagi han mao nga satellite internet constellation han SpaceX.
Partikular nga makakabulig ini ha mga estudyante nga nag-uukoy ha tay-aw nga mga lugar o kabukiran nga dire naaabot han mga internet cables.
Naglalaum naman hi Dr. Silay nga kakarawaton ngan magiging malinampuson an paglunsar han mao nga satellite internet service ha aton nasud.
Basar ha impormasyon, an Starlink service in posible nga maging abelable ha nasud pag abot han ikaupat nga quarter yana nga tuig 2022.
