TACLOBAN CITY – Waray daw pag-istudyuhi hin komprehensibo an bag-o nga Local Public Transport Route Plan (LPTRP) nga ginpatuman han syudad ugsa ine nga ig implementa, ine in sumala kan Tacloban City Councilor Atty. Jerry Uy.
Han pakianhan ine kun sakto ba nga dire pasudlon an Campetic ha Tacloban mahitungod nga gawas na ine ha sakop han syudad, gin baton hine nga dire daw ine tama mahitungod nga kun maghihimo daw hin usa nga public route plan in dire pwede nga sulod la ine han syudad igpapatuman mahitungod nga an syudad in an regional capital han rehiyon kun diin kinahanglan gihapon nga igkonsidera an mga nasulod ngan nagawas ha syudad.
Dugang pa hine, kun maghihimo hin public route plan in kinahanglan gihapon nga igkonsidera an mobility ngan an affordability han mga manakarakay agud dire an mga ine humirayo ha pagsakay ngan dire gihapon magduru-doble ha pamasahe.
Nagkamay-ada naman hin committee hearing an Committee on Transportation pero ha iya daw pagkita in dire tu-o an ginbuhat han mga ine nga pag-istudyo mahitungod nga kun nag-istudyo daw hin maupay an nasabi nga komitiba in makikit-an han mga ine an sugad nga problema ngan ginhihikay pa daw unta nira an proposal nga ginpasa han City Planning, nga nag-istudyo gihapon kasumpay hine.
Gindugang pa gihapon hine nga kinahanglan ma-amyendahan an nasabi nga ordinansa ngan istudyuhon anay hin maupay ugsa nga utro igpatuman.
